Translate
Investimet në arsim, janë prioritet i Bashkisë Kamëz. Kryebashkiaku Rakip Suli që ditët e para të marrjes së detyrës iu desh të përballet me problemet e trashëguara në arsim dhe në komunikim më vartësit iu dha zgjidhje rasteve më emergjente të hasura në prag të nisjes së vitit shkollor vitin e kaluar.
Në vijim z.Suli u njoh në detaje nga administrata me problemet në infrastrukturën arsimore që nga mungesa e bazës materiale, ngrohjes, mungesës së personelit të mjaftueshëm në dispozicion deri tek ajo që është më e prekshmja dhe më e rëndësishmja, mungesa e çerdheve, kopshteve dhe shkollave.
Pas skanimit të situatës në terren, njohjes me realitetin e trishtë Bashkia Kamëz nën drejtimin dhe vëmendjen personale të z.Suli në buxhetin e vitit 2020 i dha prioritet investimeve në arsim duke i konsideruar ato, si investim për të ardhmen për faktin se në ato ambiente do të ulen fëmijët të cilët janë e ardhmja e këtij qyteti dhe vendit.
Eshtë punuar në mënyrë sistematike në rikonstruksionin dhe ndërtimin e çerdheve të reja dhe tashmë puna ka nisur dhe për ndërtimin e shkollave me standarte bashkëkohore.
Lajmin e dha vetë kryetari i Bashkisë Kamëz Rakip Suli i cili thotë se: “Një shkollë super moderne për nxënësit e Bathores. Tashmë, jo vetëm një ëndërr! Nis puna për ndërtimin e shkollës së re “Halit Coka”, e projektuar me të gjitha parametrat e standartet bashkëkohore!”.
Ndërtimi i shkollës me parametra dhe standarte bashkëkohore vjen pas dëmtimit që pësoi nga tërmeti, e ndërkohë Z.Suli në komunikimin live që pati me kryeministrin Rama premtoi së Bashkia është gati për ndërtimin dhe të shkollave të tjera.
Kujtojmë që duke i renditur si prioritare investimet në arsimi dhe miratimin në buxhetin e vitit 2020, z.Suli kur i kërkoi Këshillit Bashkiak votën dhe deklaroi: -“Prioriteti kryesor yni do të jetë ndërtimi i çerdheve, kopshteve e shkollave, të cilat deri më sot ishin lënë totalisht në harresë!”.