Drejtoria e Ndihmës Juridike Falas, në bazë të ligjit nr. 111/2017, “Për ndihmën juridike të garantuar nga shteti”, dhe të VKM-së nr. 55, datë 6.2.2019, “Për përcaktimin e procedurave dhe dokumentacionit për autorizimin e organizatave jofitimprurëse, që ofrojnë ndihmë juridike parësore të garantuar nga shteti” (i përditësuar), bën publik njoftimin, si më poshtë:

Të gjitha organizatat jofitimprurëse që janë të interesuara të aplikojnë për të marrë autorizim nga ministri i Drejtësisë për të ofruar ndihmë juridike parësore, duhet të plotësojnë kriteret ligjore të përcaktuara në nenin 15 të ligjit nr. 111/2017 “Për ndihmën juridike të garantuar nga shteti”.

Shënim. Kjo thirrje është për organizatat e reja që dëshirojnë të bëhen pjesë e rrjetit të ofruesve të shërbimit të ndihmës juridike parësore dhe jo për ato të autorizuara më parë nga ministri i Drejtësisë, në kushtet kur me ndryshimet e VKM-së nr. 55/2019, autorizimi jepet pa afat.

Procedura dhe dërgimi i dokumentacionit

Dokumentacioni që duhet të depozitojnë organizatat jofitimprurëse (OJF), për aplikim për marrjen e autorizimit që lëshohet nga ministri i Drejtësisë, për të ofruar shërbime të ndihmës juridike parësore të garantuar nga shteti, përmban:

Dokumentacionin që provon përvojë në ofrimin e ndihmës juridike parësore, të paktën në 3 (tre) vite të veprimtarisë së tyre (nuk është e domosdoshme të jenë projekte të 3 viteve të fundit, por kohëzgjatja e projekteve në total të mbulojë një periudhë kohore prej 3 vitesh kalendarike), duke përfshirë:

• Listën e rasteve të trajtuara ose projekteve të ndihmës juridike parësore të zhvilluara nga organizata gjatë 3 (tre) viteve, si dhe të dhëna statistikore për përfituesit e ndihmës parësore nga projektet e ndihmës juridike parësore;
• Raportet përfundimtare për secilin rast, ose raportet vjetore për projektet e listuara për ofrimin e ndihmës juridike parësore, si dhe pasqyrat financiare për to;
• Në rast se organizata jofitimprurëse nuk ka zbatuar një projekt të posaçëm për ofrimin e ndihmës juridike parësore, por ky aktivitet është një komponent i një projekti tjetër, paraqiten dokumentet vetëm për këtë komponent, që lidhet me ofrimin e ndihmës juridike parësore;
• Pasqyrat financiare të 3 (tre) viteve të fundit të konfirmuara nga Drejtoria e Përgjithshme e Tatimeve; buxhetin total të secilit projekt, donatorët përkatës, si dhe listën e ekspertëve të brendshëm e të jashtëm, të përfshirë në këto projekte;
• Tabelë ku të evidentohen anëtarët e organit më të lartë vendimmarrës dhe të organit ekzekutiv;
• Formularin e vetëdeklarimit të gjendjes gjyqësore të anëtarëve të organit më të lartë vendimmarrës dhe të organit ekzekutiv (i përditësuar i 3 muajve të fundit);
• Adresën elektronike të komunikimit të organizatës dhe numrin e kontaktit të përfaqësuesit.

Aplikimi për autorizim i shoqëruar me dokumentacionin e sipërpërmendur dorëzohet pranë Drejtorisë së Ndihmës Juridike Falas, në adresën rruga “Jordan Misja”, godina nr. 3, Njësia Bashkiake nr. 9, Tiranë, brenda 30 ditëve nga data e publikimit të njoftimit në Buletinin e Njoftimeve Zyrtare në Qendrën e Botimeve Zyrtare (QBZ).

Dokumentet e sipërcituara duhet të jenë origjinale ose të njësuara me origjinalin.
Aplikimet e paraqitura jashtë afatit dhe/ose jo në formatin e kërkuar nuk kualifikohen. Për çdo paqartësi mund të na kontaktoni në: dnjf@drejtesia.gov.al.