Kamza do të jetë gati të hapë dyert e ambienteve shkollore për maturantët ditën e hënë. Prej ditësh Bashkia ka nisur dezinfektimin e të gjitha shkollave me qëllim që 18 maji t’i gjejë të gjitha të dezinfektuara dhe maturantët të kenë kushtet e duhura që nevojiten në situatën e Pandemisë së krijuar nga Covid-19.

“Siguria e nxënësve, prioriteti ynë”. Kjo është motoja e Bashkisë Kamëz dhe kryetarit të Bashkisë Kamëz, Rakip Suli i cili premton dhe garanton që në kuadër të rifillimit dhe rikthimit të maturantëve në shkolla, ka nisur dezinfektimi i të gjitha shkollave, për të ofruar siguri maksimale.

“Ka përfunduar dezinfektimi i shkollave të mesme; “Ibrahim Rugova”, në Kamëz;, “Isa Boletini”, në Paskuqan; “Gramoz Palushi”, në Babrru Qendër, “Elez Isuf Ndreu”, në Bathore dhe “Azem Hajdari”, në ZallMner, “Halit Coka” dhe “Ahmet Zogu ”, në Bathore. Grupi i punës ka përfunduar proçesin e dezinfektimit të të gjitha gjimnazeve në Kamëz dhe Paskuqan dhe do të vijojë me të gjitha shkollat e tjera deri në përfundim. Të gjithë bashkë, ja dalim”- shkruan z.Suli.

Kujtojmë që nëpërmjet një video-mesazhi drejtuar maturantëve që do të rikthehen në bankat e shkollës më datë 18 maj, ministrja Shahini përcolli disa prej rregullave kryesore që duhet të ndiqen. Rregulli i parë, është vendosja e maskës para shkollës dhe rreshtimi në distancë 1.5-2 metra nga njëri-tjetri, distancë e cila duhet të mirëmbahet gjatë gjithë qëndrimit në shkollë.

Ulja në klasa është organizuar në një distancë mes njëri-tjetrit. Do të ketë dezinfektues në klasa dhe në hyrje të secilës shkollë dhe në korridoret e secilit kat do të vendosen postera me ilustrime të thjeshta të rregullave kryesore që duhet të ndiqen nga maturantët gjatë qëndrimit në shkollë. Rregullin kryesor për parandalimin e përhapjes së viruseve, i cili është larja e shpeshtë e duarve.